კავშირი ”ღია კონსულტანტები” არაკომერციული, არასამთავრობო ორგანიზაციია. ჩვენი ხანმოკლე ისტორია დაიწყო 2002 წელს ფონდ “ღია საზოგადოება - საქართველოს” შიდა პროექტთან “საინფორმაციო და საკომუნიკაციო ტექნოლოგიების განვითარება” თანამშრომლობით. მაშინ ჩვენ შევქმენით კონსულტანტების ჯგუფი და შევუერთდით საერთაშორისო ”ირაიდერების” (eRiders) საქმიანობას. ირაიდერები, იგივე მობილური კონსულტანტები, ძირითადად არაკომერციულ ორგანიზაციებთან თანამშრომლობენ და საინფორმაციო და სატელეკომუნიკაციო ტექნოლოგიების შერჩევაში, მოძიებასა და გამოყენებაში ეხმარებიან.

ჩვენი პირველი პროექტის მიზანიც სწორედ არასამთავრობო ორგანიზაციებისთვის ხარჯებისა და დროის დაზოგვის და ტექნოლოგიების საშუალებით მათი საქმიანობის ეფექტურობის გაზრდის ხელშეწყობა იყო. პროექტის დეტალები შეგიძლიათ ჩვენი პროექტების გვერდზე იხილოთ.

2004 წლის ბოლოს ჩვენ ჩამოვყალიბდით არასამთავრობო ორგანიზაციად და “ღია კონსულტანტები” დავირქვით, ჩვენს საქმიანობას კი ღია კოდის (Open Source) პროგრამული უზრუნველყოფის პოპულარიზაცია შეემატა.
თავისუფალი/უფასო ღია კოდის პროგრამების პოპულარიზაციის ერთ-ერთი შედეგი კი განათლების სამინისტროს სკოლების კომპიუტერიზაციის პროექტის მიერ არჩევანის ღია კოდზე შეჩერება და სკოლებში ლინუქსის გამოყენება გახდა.

ამჯერად საინფორმაციო და საკომუნიკაციო ტექნოლოგიების გამოყენებაში კონსულტაციისა და ღია კოდის პროგრამული უზრუნველყოფის პოპულარიზაციის გარდა რეგიონებში უსადენო კომპიუტერული ქსელების დანერგვასაც ვცდილობთ; ღია კოდის პროგრამების ლოკალიზაციაში, ანუ გაქართულებაშიც ვართ ჩართული და საზაფხულო ბანაკების ორგანიზებით ამ საქმეში ბევრ სხვა დაინტერესებულ ადამიანსაც ვრთავთ. ჩვენი პროექტებისა და სიახლეების გვერდი, ასევე ფოტოგალერეა მეტ დეტალებს მოგაწვდით ჩვენი საქმიანობის შესახებ. 

ვცდილობთ გავცდეთ თბილისს და ირაიდერების დახმარება რეგიონებში არსებულ არასამთავრობო სექტორსაც შევთავაზოთ, რაც საკმაოდ შედეგიანად გამოგვივიდა თელავში ჩვენი ადგილობრივი კონსულტანტის მეშვეობით, თუმცა, ეს მხოლოდ დასაწყისად შეიძლება ჩაითვალოს.

მიუხედავად იმისა, რომ ჩვენ ახლა ღია კონსულტანტების სახელით გვიცნობენ, ჩვენ ვრჩებით ირაიდერების საერთაშორისო საზოგადოების წევრებად და ვთანამშრომლობთ, კონსულტაციებს ვუწევთ, ვეხმარებით და გამოცდილებას ვუზიარებთ ერთმანეთს. ჩვენს ყველაზე აქტიურ კოლეგათა შორის სომეხი და აზერბაიჯანელი კოლეგების გარდა ბულგარელი ირაიდერები არიან.